ليه دايما الواحد مبينساش الجرح
مع انه ممكن ينسي اي حاجة حلوة حصلتله
دايما الجرح ده بيكون قدام عنينا
و مبنقدرش نسامحه بسهوله
ولو حتي سامحنا برده بنكون مش زي الاول
و في حاجة اتكسرت جوانا
وليه كمان مش بنقدر نعدي و نتجاوز اللي حصل
غير بخساير اكتر من اللي ممكن نستفيده
والخساير دي ممكن تكون في احساسنا و في عواطفنا و صحتنا كمان
بجد الجرح ده اصعب حاجة في الوجود
و كمان لما يكون من حد انت مش متوقع منه كدة
وممكن تكون شايف اللي جرحك مش همه اي حاجة
وقادر يعيش و ينسي
وانت برده مش قادر تنسي.
ومش عارف تعيش
طب معناه ايه لما تبقي مجروح من حد جرح جامد اوي
وانت كمان مش غلطان
و مستعد كمان تسامحه
((رغم كل الل حصل بعترف مش قادرة انساك و مش حقدر انساك))
ربنا يوفقك
.jpg)
41 comments:
هو اية الي حصل بقى؟؟؟
حقيقي اصعب جرح هو الجرح من اقرب انسان لقلبك وللاسف طعناته دامية وموجعة بس لكنها مش قاتلة علشان تنهي ماسأة
جميل احساسك البرئ
اها ..هذه مأساة حقيقية..
للأسف الواحد مبينساش بسهولة..بس كدا كدا هينسى لأن اسمه إنسان..
ربنا معاكي ويوفقك
تحياتي :)
L0vElYGh0sT14 :
اللي حصل زي ما انا كاتبة كدة :)
ميرسي علي سؤالك
شملولي بن سحلولي :
شكرا علي الكومنت
سعيدة بزيارتك كل مرة :)
Mero:
منور والله
ميرسي علي اهتمامك :)
أهاا أوك
(طب معناه ايه لما تبقي مجروح من حد جرح جامد اوي
وانت كمان مش غلطان
و مستعد كمان تسامحه)
.........
هو دا الحب الحقيقى
الا مهما حصل من الحبيب بنسامح
احساسك جميل وقال حاجات كتير جوايا
تحياتى(:
الجرح للاسف مبيجيش غير لو حد قريب
لو بعيد محدش هيهتم بس لما حد قريب
والواحد عاش معاه لحظات سعيدة كتير
وفجاة يبقة هوه السبب فى الحزن
سعتها بيبقة الجرح صعب اوى وفعلا ممكن
ميتنسيش
بس
اللحظات الحلوة مبتتنسيش برده
على فكرة لما نفتكرها
لما تبقة لحظات سعيدة بجد
ومع ناس بنحبهم ويحبونا
NoRaaMaHdy :
هي دي المشكله :(
بجد نورتي البلوج
شكرا علي الكومنت :))
seven:
هي اه اللحظات الحلوة مبتتنسيش بس بردو ممكن نسهو عنها لفترات و نرجع نفتكرها تاني
غير الجرح خالص
متشكرة بجد علي الاهتمام
نورت بجد :)
اوحش حاجه انك تعيشى الم الموقف فى وقته وكمان بعديه وتفضلى تعيشى فيه واى حاجه تفكرك بيه
ربنا معاكى وتقدرى تنسى وتعيشى حياتك انتى كمان من غير متفتكريه
سلامى
shayma :
ربنا يخليكي بجد انا محتاجة الدعوة دي اوي:(
ميرسي علي زيارتك و اهتمامك
بعد السلام عليكم
تعرفى ليه الجرح بيعمل كل دا ؟
عشان زى ما أنتى قولتى
بيجى من حد أقرب حد لينا .. من حد ما نتوقعش انه يعمل كده
من حد احنا كل ذنبنا اننا حبناه بجد واخلصنا ليه بجد .. ويا أما اديناله
عشان كده بيبقى صعب يتنسى واحيانا كمان صعب يتسامح فيه
ولكن انت لما تقولى
طب معناه ايه لما تبقي مجروح من حد جرح جامد اوي
وانت كمان مش غلطان
و مستعد كمان تسامحه
يبقى حبك كنز عشان حب حقيقى .. حاولى تدى الكنز للى يستحقه
وربنا يوفقك يارب
تحياتى
abo salah:
ميرسي بجد علي كلامك
و علي زياراتك الدائمه
اتمني علي طول وجود تعليقاتك عشان بجد بتسعدني :)
و ربنا يسهل و انسي بس مش متهيألي
بعد السلام عليكم
بصى أنا عايزك تتأكدى أنه
وعسى أن تكرهوه شيئا وهو خير لكم
وتاكدى ان الأنسان اللى جرحك مهما طال الوقت عليه هيجي لحظة ويندم علي جرحه ليكى
ولو ربنا كاتبهولك يبقي الامور هتتيسر وهتسامحيه ويرجع نادم
ولو مش كاتبهولك اتاكدي ان ربنا لسه شايلك الهدية
بس أنا عارف ان وقت الجرح مابنفكرش في الكلام دا ولا بنشوفه ادام عينينا
انا مش هادعيلك ان انت تنسى بسرعة
لأن ممكن ربنا يكون كاتب الامور ترجع تانى
ولكن هادعيلك
أن ربنا يرزقك الخير حيث كان
أنا أسف علي الخضة
هههههههههههه
وأكيد زهقتك للمرة التانية في بوست واحد
تحياتي
abo salah: ربنا يخليك
بجد عاجزة عن الكلام بعد اللي انت قلته
ربنا يكرمك ان شاء الله
و متقولش زهقتك دي
بجد بكون مبسوطة بوجودك و بردودك
شكـــــرا :)
انا مكنتش عاوز ادخل على الكومنتات
لانى كنت عاوز افضل اسمع الاغنيه ههههههه
بس بجد بوستك رائع
المشكله اننا الجرح بيفضل معلم معانا وقت طويل لغاية ما نقدر ننسى واوقات مش بنقدر ننسى
تحياتى
علاء
عايش ولكن :
نورت البلوج
و شكرا علي الكومنت :)
مش دايما مش بنقدر ننسى.....بس احيانا فعلا بيبقى صعب تنسي لما زي ما قلتي الجرح ييجي من حد ما تتوقعش منه ده ولما كمان يبقى شايف انه عادي وانه ما حصلش حاجة ومش حاسس باي ذنب ولا حتى شايف انه غلط.......ساعتها بيبقى صعب ننسى لكن ممكن نسامح والدنيا تمشي......
ياريت ماتكونيش فهمتيني غلط من سؤال عن الي حصل أو تحسي أني متطفل ولا حاجة كدة ولا كدة ... والله انا غرضي كان شريف وكان مجرد سؤال بريء
الواحد لو عايز ينسى أي جرح في حياته هينساه
ربنا سبحانه وتعالى ادانا عقل ... الحمدلله ... نقدر نعمل بيه ما نسميها معجزات البشرية ... وزي ما انتي شايفة العالم دلوقتي من ناحية التقدم والتكنولوجيا والحاجات الكبيرة والرهيبة الي بنشوفها دي بمجرد فكرة مرت على العقل وابتكر الشيء دة فعمل حاجة كبيرة
يعني بجد سبحان الله
الي عايز افهمولك انك شاغلة عقلك وتفكيرك بحاجة بتخليكي متأملة ومجروحة مع ان العقل اكبر واعظم من انك تفكري في اي حاجة تزعلك وتألمك ... فكري في نفسك ومستقبلك وحطي هدف واحد بس في حياتك وطريقك وحاولي توصليله مهما كانت العواقب والمطبات الي في حياتك بس هتوصليلوا هتوصليلوا مهما ... وأشكري ربنا أنه أنعم علينا وميزنا عن جميع المخلوقات بشيء عظيم جداً ... أبهر جميع العلماء والمفكريين في طريقة عمله وتفكيره وتخزينه وابتكاره
والله يوفقك ويوفقنا جميعاً
وياريت متكنيش زعلتي مني مرة تانية لاني بجد بجد مش قصدي اي حاجة والله العظيم
تحياتي لكي بالعطور الفرنسية
بجد إحساس فظيع
وربنا يبعد عنا الجروح
تحياتى لكى
دواير:
فعلا عندك حق
ميرسي علي الكومنت :)
L0vElYGh0sT14 :
ابدا محستش بكدة خالص متقولش كدة
ده حتي سؤالك حسسني ان في حد لسه ممكن يسأل علي الواحد و هو في ازمة
و ميرسي بجد علي اهتمامك
و انا فعلا بعمل زي ما انت بتقول بس اكيد برده هي مسأله وقت و ربنا يسهل ان شاء الله
ميرسي تاني :)
رئـــــيسـة حزب الأحلام :
اميـــــن :)
للأسف الواحد سهل أوي ينسى أي حاجة حلوة لكن صعب أوي أوي ينسى الحاجات المؤلمة حتى لو كانت عبيطة ....للأسف هو ده الإنسان غاوي نكد و بيجري وراه
ربنا معاكي ...
حيكي الله :)
صدقا
كل الجروح تضمر بمرور وتوالى الايام
أى ان الزمان قادر على مداومة كل الجروح
وعن تجربة
فقط ثقى فى نفسك والايام
جميل اننا ندعى للى جرحنا
لكن مش جميل ابدا اننا ماننساش
احنا نقوله ربنا يوفقك ويفوقنا
لازم صدقينى
Zanooba (Zeinab sab9n):
فعلا احنا كدة :(
ميرسي علي مرورك :)
Mercy Devil:
فعلا انا بعمل كدة دلوقتي
شكرا علي الاهتمام :)
blue-wave:
بحاول اهو والله
و ربنا معايا و معانا كلنا
ميرسي علي الكومنت :)
أحيانًا بيكون الجرح مش مقصود .. ساعتها لا بد من التماس الأعذار
وأحيانًا بيكون مقصود ساعتها يكون البني آدم مش مستاهل اساسًا .. لو خدناها كمقياس للرجال وعملاً بالاصول هنقول مش راجل في كلمته .. ميساويش راجل .. ميستاهلش زعل !
تعملي ايه لو مثلاص كنتي بتحبي واحد جدًا ومن غير ما تفهمي ولا هوا يفهم فجأة لقيتوا نفسكم كل واحد في ناحية - دولة تانيه- وممنوع اي وسيلة اتصال !
بدون حتى لقاء أخير او مكاملة اخيرة تفهمي فيه حاجه من اللي بيحصل !
علشان الجرح بيسيب علامه في القلب انما الحاجه الحلوه بتسيب علامه في العقل
فالعقل بينسي مش بيفتكر الا لما بتيجي حاجه تفكره
بس القلب عمره ما ينسى بجد
بس هييجي وقت والجرح ده يتداوى
لان مافيش جرح مابيلمش
وهو هياخد وقت
كوارث:
المشكله ان الجرح مقصود :(
la Princesa ... WHiSPeR:
يا مسهل
ميرسي علي الكومنت :)
زمان انجرحت ..
حسيت بأن الدنيا صغرت في نظري أووووووووي لدرجة إنها مبقتش تساعيني أنا و اللي جارحني مع بعض و قلت انه خلاص كل شيء انتهى و مبقلهوش أي معنى لا في صداقة مخلصة و لا في حب لوجه الله و لا في خير من غير مصالح و لا رياء .. كل شيء فقد معناه في نظري >> حتى نفسي حسيت انها عاملة زي الروقة المخرمة >> يطيرها الهوا من حته لحته و ملهاش حتى حكم على نفسها ..
بكيت و بكيت و بكيت ..
لحد ما جت لحظة >>
بجد حسيت اني فهمت فيها .. مش هقول فهمت كل حاجة .., لكن على الاقل فهمت جزء لا يستهان بيه من ناحية الجراح و اللي بيجرحوا ..
فهمت ان الدنيا أصغر بكتير من إني أشوفها كبيرة زي ما كنت شايفاها قبل ما انجرح .. و إحساسي بانها اصبحت فجأة صغيرة كان غلط >> لانها اصلاً كانت صغيرة
و فهمت ان الجرح اللي بجد >> يكون من حد قريب قوي مش من مجرد شخص عابر و ده قليل ما بيكون >> او بيكون حب ليا و خوف عليا .., أينعم جه في صورة جرح .. بس مين عارف ايه هيه الظروف المحيطة ..
و فهمت إني مهما كان جرحي و مهما كانت صفة اللي جرحني من قريب أو غريب .. قاصد او مش قاصد .. الظروف دفعته لكده او العكس .. أنا هعيش هعيش .. لازم أعيش
*
*
*
حبيت فضفضتك أوووووووووووي
و اللي حبيته أكتر صدق تعبيرك ..
و إنك دعمتيه بعاطفه رقيقة من روحك و إحساسك ..
شكراً لانك إدتيني فرصة الفضفضة << بدوري ..
و كوني كما انتِ ..
و >> سلام
MooN MoN:
بجد كلامك ريحني اووووي
و حسسني اني فعلا حقدر انسي
واني مش لوحدي بس اللي حصلي كدة
وفي ناس قدرت تنسي وتعيش
بجد ميرسي ليكي علي الكلام ده
و نورتيني ونورتي البلوج :)
عشان كان غالي جرحه صعب
وعشان بنحب اوي مش بننسى بسهوله
وعشان هو محبش بجد قادر يعيش حياته
وعشان احنا عاطفيين في دنيا مادية بنتعب
وعشان وعشان وعشان ..........
بيدو
bedo:
هو اكيد محبش بجد :(
ميرسي ليك
ليه دايما الواحد مبينساش الجرح
علشان الجرح دايما ليه أثر بيفكرنا بيه
علشان لما القلب بيتجرح بيفضل مكان الجرح علامة
تئن كلما مرت ذكري الجرح ده
زي ما بنبتسم لما تمر ذكري طيبه
لكن الألم أقوي
علشان كده مش بيتنسي
بنفرح لما بنشوف ورده
بس الورده ممكن تدبل
لكن لو اتجرحنا تفضل علامة الجرح باقيه
ممكن ماتتفتحش تاني
لكن يفضل منظرها بس مبعث ألم
------------------------------
وليه كمان مش بنقدر نعدي و نتجاوز اللي حصل
غير بخساير اكتر من اللي ممكن نستفيده
---------
بالعكس .. الخسارة هنا هيا اللي بتعلمنا
بتعلمنا نبطل نثق في حد مايستاهلش ثقه
أو نعطي قلبنا لحد مايستاهلش حب ولا التفات أصلا
ماهو احنا مش هانتعلم بالساهل كده
علشان نتعلم لازم ندفع تمن
والتمن ده اننا نتألم ونخسر
انتي صدقتي ان التعليم مجاني ولا إيه ؟
هههههههه
=============================
بجد الجرح ده اصعب حاجة في الوجود
و كمان لما يكون من حد انت مش متوقع منه كدة ولا كنت تتخيل انه ممكن يعمل كدة
--------
فعلا
لما تكون الطعنة جاية من حد انت عارف انه بيكرهك بتبقي متوقعه ومش مستغربه وممكن حتي تفاديها
وإن أصابتنا فبيبقي تأثيرها مش كبير أوي
لكن لما ندير ظهورنا لأحبة وأصدقاء افتراضيين
ثقةً بأنهم حماة ظهورنا
واننا مطمئنيين لهم جدا والضربه تييجي منهم
بصراحه بتبقي مهينة أكتر منها مؤلمة
علشان كده بتوجع أكتر
============================
طب معناه ايه لما تبقي مجروح من حد جرح جامد اوي
وانت كمان مش غلطان
و مستعد كمان تسامحه
-------
معناه ان قلبك كبير ونقي
معناه انك مش قادرة تزعلي منه
معناه انك حبيتي بجد
أو صادقتي بجد
وأخلصتي بجد
وقلبك رغم انه موجوع مش عارفه تكرهي
===========================
ربنا يكرمك
البوست ده طلع حاجات كتير جوايا
وأتمني كلمتي توصلك وتقدري تشوفي فيها جواب لأسئلتك في البوست ده
سعيده بمروري عندك
كل سنه وانتي طيبه
ورمضان كريم
Lyssandra
lyssandra:
مش عارفة اقولك ايه والله
انا اللي اسعد بمرورك عندي كتــــــير
و ان شاء الله مش اخر مرة :)
Post a Comment