اهو جيه ياولاد

مش مصدقة ان رمضان خلاص بكرة

يااااااااااااااه اخيراا
متتصوروش رمضان بيفرحني اد ايه
حتقولوا بيفرح كل الناس
بس مش ادي بردو :p
بحب كمان اليومين اللي قبل رمضان
وانا بتفرج علي اخويا و اصحابه و هما بيعلقوا الزينة و النور وكدة
وانا مشغلالهم في البيت اغاني رمضان
واخواتي بيحطوا الحجارة في الفوانيس و نسمع اغنية كل فانوس
بحب اوي الجو ده والطقوس دي
و طبعا اليوم اللي قبل رمضان علي طول اللي هو انهاردة
بلاقي كل سنة ناس كتـــــــير اونلاين
صحابي في الكلية و المصيف وحتي الناس اللي مبتدخلش بلاقيها قاعدة اليوم ده
بحس احساس مختلف كدة
و المسجات بتاعة كل سنة
وبتكون علي طول مختلفة عن السنة اللي قبلها و كلام جديد
وطبعا مننساش لمسات المواطن المصري في بعض الرسائل الظريفة اللطيفة
:D

وانك تبقي محضر نفسك تشوف الفوانيس في كل مكان في الشارع

و موائد الرحمن

نيجي بقي للسحور:
سحور اول يوم
طبعا طبق الفول المحترم

و بعدها الزبادي بس بلاش زبادي اكتيفيا
:Dعشان ميهضمش الاكل بسرعة
و بعدين نصلي الفجر و ننام
و نصحي اول يوم رمضان بقي
نقرأ في القرأن جزء كل يوم
عشان نختمه بأذن الله

نيجي بقي للعزومات في رمضان متتوصاش
القرايب و الصحاب و الديش بارتيز والحركات
بس احنا اول يوم علي طول بنكون لوحدنا
الاسرة بس يعني.
اول ما نسنع صوت المدفع و الاذان
نشرب كوباية البلح بالبن
كلنا بنحبه في البيت
واساسي قبل الفطار
وبعدين زمان كان بكار بييجي علي الفطار

ياريت ييجي تاني السنه دي عشان بحبه اوي :))

و الاكل بقي :
اول يوم لا يخلي من محشي ورق العنب


شيء اساسي في اول يوم
غير طبعا الحاجات التانية

و بعد ما الواحد يدبها علي الفطار
و ميعرفش يأخد نفسه يصلي المغرب
و يرشق قدام التليفزيون يفلي كل القنوات
ونشوف كل قناه بتعرض ايه و نقرر حنتفرج علي ايه
بعد شوية اكيد بنجوع تاني
هههههههههههه
ندخل علي الحلو بقي
قطايف و كنافة و بلح الشام


وبعدين نحضر نفسنا عشان ننزل نصلي التراويح
و اتصل بصحابي و نتقابل و ننزل سوا نصلي كلنا
*بحب اوي الاقي الناس كتير نازلة
والجوامع كلها زحمة

بس مش كل يوم بنزل ساعات بصلي في البيت
بس اخر 10 ايام بنزلهم كلهم
ربنا يقدرنا السنة دي و ننزل كل يوم
وبعد ما نرجع بقي
نكمل المسلسلات و القعدة قدام التليفزيون
و نشرب كوباية التمر هندي بتاع مامتشي حبيبتشي :))

و بعدين اللي عايز ينام ينام
واللي صاحي صاحي و بنتجمع تاني علي السحور و هكذا....

((بحب اوي اعيش رمضان بكل تفاصيله و لو حاجة مش موجودة بتضايق اوي))

بس بحاول اعمل كل حاجة تخليني استمتع بيه بجد
كل سنة وانتوا طيبين والناس كلها بخير
و بأذن الله رمضان السنه دي نحاول نلم حسنات علي اد ما نقدر
واللي عايز يتغير للاحسن عنده فرصه كبيره
واللي عايز يعمل خير
واللي عايز يتوب
ربنا يتقبل مننا ان شاء الله
رمضان كريم :)

كله منك بس حفضل احبك

فرحانة
زعلانة
مبسوطة اوي
متضايقة كمان
كله مرة واحدة
تعبت بجد
بس بفكر اكتر في الحاجات اللي مفرحاني و بحاول انسي اللي مزعلني وبتعامل عادي
المشكله اني نفسي اكون احسن في كل حاجة
بحاول كتير وبفشل اكتر
بس بردو بحاول يمكن وليه لأ
والمشكله الاكبر اني متعلقه بحاجات ملهاش لازمة عدت وفاتت
كله من البحر لما بكون قدامه بحس احاسيس مختلفة
بيفرحني كتير و يضايقني اكتر بس بردو بحبه و بعشقه كمان
و بشوف فيه كل حاجة عملتها و عايزة اعملها
والمرة دي الجرعة كانت كبيرة شوية كنت بقعد علي البحر بعد الفجر و اشوف الشروق وفي المغرب و اشوف الغروب
وكل ما ابص للبحر ابقي عايزة اعيط اوووووي بس للاسف معانا ناس و مش بعرف اعيط و حد شايفني
(((للعلم بس ده مش المصيف بتاع الجامعة ده اللي كان مع اهلي وناس صحابنا كدة متعودين نروح كل سنه مع بعض )))
و من الحاجات اللي كانت بتيجي في دماغي علي البحر
عايزة اعمل المشروع بتاعي بعد ما اتخرج و مكسلش
عايزة اقابل واحد يحبني بجد واحبه عشان بجد قليل اوي لما الواحد يقابل حد يحبه حب حقيقي
لدرجة اني قربت اكره الحب :(
عايزة ابقي حاجة كويسة و ابقي انسانه ليها دور في اي حاجة كويسة
هو انا اه بعمل حاجات كويسة بس عايزة الناس تشاور عليا في يوم و تقول شايفين البنت دي بتعمل ايه
بس حاسة بحاجة مكتفاني مخلياني معملش حاجة
يالا رمضان جاي و ربنا يسهلنا كلنا امورنا
و بأذن الله اعمل حاجات كويسة في رمضان عشان يبقي الثواب مضاعف
واعمل refresh كدة لكل حاجة
وكمان احضر نفسي للتربية العملي اللي المفروض نازلاها و معرفش لسه حنزل مدرسه ايه؟؟؟
اهو احاول اظبط كل حاجة كدة عشان استريح يمكن الدوشة دي اللي عامله فيا كدة
و كل سنه وانتوا طيبين
ورمضان كريم :)

I'm Gonna Miss You All

مســــــــــــــــافرة اخيرا

و مش اي سفر

ده مع صحابي بس

يعني مفيش اهل و الكلام ده

برده عشان مخكوا مايروحش بعيد و تقولوا ايه البت السايبة دي :D

ده مصيف تبع الجامعة لمطروح

و بنات بس

دي تاني مرة اطلعها

و كانت جامدة اوي

و يارب تتطلع حلوة السنه دي

و ربنا يستر و نرجع بالسلامه

اشوفكوا بعد اسبوع او ممكن بقي اسافر بعدها مصيفنا احنا بتاع الاسره الكريمه :) و

كدة بقي اشوفكوا بعد اسبوعين او حاجة كدة

ســــــــــــــــــــــــــــــــــلام :)